Секретот може да биде со различна боја и мирис, во некои денови ќе биде појак, некогаш послаб, но се случува и главно не е причина за аларм. Тоа едноставно е начин на кој вагината се чисти од штетните бактерии и мртвите клетки и е сосема природна појава.
Сепак, за тоа ретко се зборува, па многу жени се плашат штом забележат дека вагиналниот секрет ја сменил бојата и изгледот. Стручњаците велат дека некои промени се нормални и очекувани за време на менструалниот циклус, додека во некои случаи е препорачливо да се побара совет од гинеколог. Еве кои се најчестите облици на вагинален секрет и кога е паметно да се посети гинеколог.
Нормално: Проѕирен секрет
Секрет кој го имате секој ден и е поврзан со менструалниот циклус, па ќе биде нешто послаб веднаш после менструација, а нешто посилен пред овулација. Исто така, можеби ќе забележите дека се засилува после вежбање или секс.
Нормално: Млечнобел секрет
Таков секрет, исто така, може да се појави за време на циклус, особено во првата половина. Главно не укажува на ништо опасно, но ако имате уште некои симптоми како што е чешање и забележувате дека станува густ можеби станува збор за габична инфекција.
Нормално: Растеглив секрет
Телото се подготвува за бременост и количеството на естроген расте околу овулацијата, па тогаш имате посилен секрет од обично и толку е растеглив што може да се развлече меѓу прстите. Се вика уште и „плодна слуз“ и всушност е знак дека можете да забремените.
Нормално: Бледорозов секрет
Ако забележите благо розова боја пред менструација не мора да паничите. Веројатно, наскоро ќе добиете. Но ако таков секрет се појави на средина од циклусот, тоа би можело да биде ран знак за бременост!
Внимание: Густ, грутчест секрет
Додека млечнобелиот секрет е нормален, оној налик на зрнест не е! Тоа е симптом за габична инфекција. Не е лошо веднаш да појдете кај својот гинеколог.
Внимание: Секрет со мирис на риба
Ако забележите мирис на риба, тоа би можело да е симптом на бактериска вагиноза, инфекција предизвикана од бактерии во матката. Таа болест обично се лекува со антибиотици, па морате да појдете на преглед.
Се разбира, секоја жена е личност сама за себе, секоја е различна една од друга и она што кај една е нормално, на друга може да и биде сосема нетипично. Најважно е да го следите своето тело и да реагирате веднаш штом забележите нешто невообичаено.
