Сите се чувствуваме беспомошно и се обидуваме да помогнеме на било кој начин, дали да донираме маски или да волонтираме. Сите се обидуваат да направат што можат, а јас одлучив да бидам меѓу волонтерите кои први ќе примат експериментална вакцина, изјавила за Science News, Софија Апшо (22), студентка од Атланта.
Софија Апшо е една од 45. доброволци вклучени во првата фаза на клиничкиот експеримент во кој се проверува безбедноста на вакцината против КОВИД-19, што ја развила една американска биотехнолошка компанија. Тој клинички експеримент, прв во светот, почнал на 16 март во два истражувачки институти во Сиетал и Атланта.
Апшо вели дека кога слушнала за клиничкото испитување, се јавила во компанијата дали може да се вклучи, и веќе на 23 март била повикана за преглед, а четири дена подоцна ја примила првата доза вакцина.
САД И КИНА
Искуството е слично на она како кога се вакцинирате против грип, раскажала Софија Апшо, која на 24 мај ќе ја добие втората доза на вакцина.
Станува збор за вакцина која спаѓа во т.н вакцини на нуклеински киселини, а во овој конкретен случај користеле РНК (рибонуклеинска киселина) како би го поттикнале нашиот имунолошки систем. Класичните вакцини користат или комплетни, но мртви вируси или дел од нивната протеинска обвивка како материја за “учење и препознавање“ на нашиот имун систем со цел да го запомни вирусот и еднаш кога ќе дојде во контакт со него, успешно да го елиминира. Освен тоа, во тек се и уште четири други клинички студии, една во САД, а три во Кина.
ПРОФЕСОР ГИЛБЕРТ
За разлика од повеќето стручњаци кои предупредуваат дека безбедна и ефикасна вакцина против КОВИД-19 ќе биде достапно дури за 12 до 18 месеци, британските научници под водство на проф. Сара Гилберт од Институтот Џенер на Универзитетот Оксфорд се многу пооптимистични.
Во разговорот за британскиот весник Тајмс, проф Гилберт пред неколку дена изјавила дека е 80 проценти сигурна дека вакцината против КОВИД-19 што ја развива нејзиниот тим, може да биде достапна веќе во септември.
КАНДИДАТИ
Во анализа која ја објави научното списание Nature, група на стручњаци од глобалната организација CEPI ( Коалиција за иновативни решенија за пандемија) во Осло наведува дека моментално постојат 115 кандидати за вакцина против КОВИД-19. Од тие 115 кандидати, 78 се потврдени како активни, а 37 се непотврдени. Од активните 78, 73 во моментов се во истражувачка или претклиничка фаза, а пет се во прва фаза на клинички испитувања.
