Нова студија донесува се поголем број на докази дека не постои врска помеѓу вакцинацијата против КОВИД-19 и намалените шанси за зачнување.
Наместо тоа, паровите во студијата имале нешто помали шанси за зачнување ако машкиот партнер бил заразен со коронавирус во рок од 60 дена, што дава уште повеќе причини да се вакцинираат против КОВИД-19, бидејќи болеста би можела краткотрајно да влијае на плодноста кај мажите, се наведува во студијата објавена во American Journal of Epidemiology.
“Овие наоди укажуваат на тоа дека инфекцијата SARS-CoV-2 кај мажите може да биде поврзана со краткотраен пад на плодноста и дека вакцинацијата против КОВИД-19 не влијае на плодноста на партнерот“, пишуваат научниците од Школата за јавно здравје при Универзитетот во Бостон.
Научниците напишале дека “ова придонесува на доказите од студиите на животни, студиите на луѓе кои се подложени на лекување за плодност и испитувања за вакцинација против КОВИД-19, од кои ниту една не пронашла поврзаност помеѓу вакцинацијата против КОВИД-19 и помала плодност“.
Тие додаваат дека “неколку студии не документирале значајна поврзаност помеѓу вакцинацијата против КОВИД-19 и ризикот од спонтан абортус“.
Студијата опфатила податоци од 2.126 жени, на возраст од 21 до 45 години, во САД и Канада. Жените се запишувале во студијата од декември 2020 до септември 2021 година, а научниците ги следеле до ноември 2021 година.
Податоците покажале дека иако претходната инфекција со КОВИД-19 не била силно поврзана со веројатноста за зачнување кај жените, но кај мажите кои имале КОВИД-19, постоела поврзаност со “минливо намалување“ на веројатното зачнување.
Лекарите појаснуваат дека паровите кај кои машкиот партнер бил позитивен во рок од 60 дена имале 18 проценти помали шанси да забременат за време на тој менструален циклус, но немало никаква разлика во стапките на зачнување за паровите кај кои машкиот партнер бил позитивен повеќе од 60 дена пред циклусот, во споредба со паровите во кои машкиот партнер не бил позитивен.
