Комплетно вакцинираните лица, односно оние кои се ревакцинирани во две дози вакцина против новиот коронавирус, според последно истражување, имаат трипати помала веројатност да заболат од КОВИД-19, во однос на невакцинираните.
Станува збор за студија на научниците од Империал колеџот во Лондон, спроведена на 98.233 теста на коронавирус, помеѓу 24 јуни до 12 јули.
Позитивни биле вкупно 0,63 отсто од тестовите (или 1 од 158), при што уделот на позитивни кај невакцинираните изнесувал 1,21 процент, а кај ревакцинираните 0,4 проценти.
Во студијата исто така се истакнува дека резултатите покажуваат помала веројатност дека вакцинираните ќе го пренесат вирусот од невакцинираните, оти количината на вирусот во нивниот организам е помала.
Меѓутоа, дел од британските научници повикуваат на внимание, откако владата на 19 јули ги ублажи рестриктивните мерки, вклучувајќи укинување на задолжително носење маски во одредени затворени простори.
Пол Елиот, професор на одделот за јавно здравје при Империал колеџот и директор на истражувањето, вели дека резултатите “ги потврдуваат претходните податоци кои покажуваат дека двојната доза вакцина дава добра заштита против инфекцијата. Меѓутоа, исто така можеме да видиме дека и понатаму постои ризик од инфекција, оти ниту една вакцина не е 100 проценти ефикасна, а знаеме дека некои ревакцинирани лица и понатаму може да заболат од вирусот“, објаснува тој.
