Ново истражување открило дека постои четири пати поголема веројатност дека мажите ќе доживеат срцев или мозочен удат ако имаат проблеми со ерекцијата. Не само тоа, истражувачите откриле дека постои поврзаност помеѓу болестите на непцата и ерктилната дисфункција. Исто така, откриено е дека срцевиот или мозочниот удар се појавуваат во просек само четири години откако прв пат ќе се дијагностицира пад на сексуалниот нагон.
НОВО ИСТРАЖУВАЊЕ
Студијата објавена во списанието Journal of Periodontology следела 158 мажи во средни години во Шпанија. Авторот на студијата проф. Франциско Мета од Универзитетот во Гранада открил дека врската помеѓу болестите на непцата, еректилната дисфункција и срцевиот (мозочниот) удар е затврднување на артериите.
Проф. Мета објаснува дека тригер за тоа е периодонтитисот (болест на непцата) кој прв влијае на малите крвни садови во пенисот и нив ги стврднува. Подоцна проблемот се јавува и во артериите на останатите витални органи.
Најчестиот симптом на болеста освен крварење на забното месо е и лошиот здив, што на мажите може да им биде знак за предупредување кој ќе спречи понатамошни проблеми.
Учесниците во истражување со двете состојби (болест на непцата и еректилна дисфункција) имале поголема веројатност дека ќе доживеат мозочен удар, срцев удар, смрт од кардиоваскуларни болести или затајување на срцето. Исто така биле ризична група за развој на ангина, а било поверојатно дека ќе им биде потребна операција на бајпас на срцето.
ДАЛИ ЕРЕКТИЛНАТА ДИСФУНКЦИЈА Е СИМПТОМ ЗА ПОТЕШКИ БОЛЕСТИ?
“Почетокот на еректилната дисфункција може да биде знак за предупредување за потенцијално сериозни кардиоваскуларни состојби“, потенцира проф. Мета.
Исто така, важно е да се знае дека ризик факторите за еректилна дисфункција се еднакви со ризик факторите за кардиоваскуларни болести: пушење, дијабетес, физичка неактивност, седентарен начин на живот, висок крвен притисок, високи маснотии во крвта. Причината е што артеријата на пенисот е една од најтесните во телото (потесна од артериите кои го снабдуваат срцето со крв) и е една од првите што се стеснува и затнува кога ќе дојде до таложење на маснотии во крвните садови, и може да биде претходник на иден срцев инфаркт.
