Повеќето од нас доживуваат две промени на гласот во животот: прво во текот на пубертетот, а потоа втор пат како стареењето предизвикува структурни промени кои можат да го ослабат гласот. Но, промена на гласот доаѓа и кога се развива некоја болест или опаѓа менталното здравје. Затоа се повеќе лекари гледаат на гласот како на биомаркер – нешто што ни кажува дека е присутна некоја болест.
Сосема е вообичаено вашиот лекар да ве замоли да го изговорите звукот А при преглед на грлото, но неодамна е покренат голем проект на Националниот институт за здравје за да се дефинираат обрасците што се појавуваат кај некои болести.
“Учиме дека постојат обрасци во промените на гласот кои можат да укажуваат на низа состојби, вклучувајќи болести на нервниот систем и ментални болести“, вели д-р Јаел Бенсусан од Универзитетот Јужна Флорида и главен истражувач на проектот „Гласот како биомаркер“. Анализата на гласот како стандарден дел од грижата за пациентите, слично на проверките на крвниот притисок или холестеролот, може да им помогне на лекарите да ги препознаат оние на кои им е потребна медицинска помош што е можно поскоро.
“Говорот е комплициран, вклучува голем број органи – од белите дробови до устата и мозокот. Проблем во кој било од овие делови може да влијае на гласот”, вели доц. д-р. Марија Пауел, специјалист отоларинголог на Универзитетот Вандербилт во Нешвил, која исто така работи на проектот.
- Додека зборуваме
Во текот на следните четири години, целта е да се соберат 20.000 до 30.000 гласовни снимки заедно со здравствени податоци за секој испитаник. Резултатот ќе биде широка база на податоци што научниците ќе можат да ја користат за да развијат алгоритми кои ги поврзуваат здравствените состојби со начинот на кој зборуваме.
