Повеќе од 55 милиони луѓе ширум светот живеат со деменција, нарушување што може да ви ја одземе меморијата и другите когнитивни функции, како што се размислувањето, одлучувањето, јазикот и други. Според Светската здравствена организација, секоја година има 10 милиони нови случаи на деменција во светот и моментално деменцијата е седма водечка причина за смртност и една од главните причини за инвалидитет и недостаток на независност кај постарите лица на глобално ниво. Деменцијата се јавува кога ќе дојде до оштетување или губење на нервните клетки во мозокот и кога клетките повеќе не можат меѓусебно да комуницираат.
Иако се работи за синдром кој првенствено ги погодува луѓето постари од 65 години, тој не се смета за нормален дел од стареењето, а има и случаи кога се заболени и помлади луѓе. Покрај тоа, развојот на болеста може да започне порано отколку што мислите. Деменцијата, имено, започнува многу порано пред лицето да го доживее првиот симптом. Всушност, тоа е дваесетгодишен процес кој може да започне веќе во четириесеттите. Добрата вест е дека, со правилен начин на живот, имате доволно време да го спречите развојот на болеста или барем да го одложите.
Не постои лек за деменција, но постојат начини да се намали ризикот од развој на болеста. Дотолку повеќе, можно е процесот и да се сврти и смени. Постојат најмалку 36 фактори на ризик кои сите заедно водат до когнитивно пропаѓање. Од веродостојните научни истражувања познато е дека ако зеземеме сеопфатен пристап, можеме успешно да го превенираме, одложиме, па дури и да го свртиме веќе започнатиот развој на деменција.
ЗНАЦИ НА ДЕМЕНЦИЈА
“Знаците на деменција вклучуваат прогресивни промени во когнитивните способности, како што се помнење, планирање, снаоѓање со секојдневните задачи, невообичаени промени во расположението, нарушувања на спиењето и зголемено ниво на фрустрација. Повеќето форми на деменција вклучуваат почетно слабеење на краткорочното помнење, по што следи зголемено губење на меморијата, додека долгорочното помнење останува релативно непроменето, барем во првите неколку години од болеста. Пациентите лесно стануваат фрустрирани, многу се емотивни и можат да станат вознемирени или летаргични. Сепак, важно е да се напомене дека обичната заборавеност, благата отсутност со духот, периодичните промени во расположението и промените во вообичаениот ритам на спиење не се веднаш причина за загриженост. Но, ако овие знаци и симптоми станат поприсутни, позастапени или посериозни, би било мудро да се побара лекарска помош“, објаснува д-р Џејмс Џордано, професор по неврологија на Универзитетскиот медицински центар Џорџтаун. Знаците на деменција варираат од лице до лице.
Вообичаени симптоми вклучуваат зачестени проблеми со помнењето, проблеми во однесувањето и промени на карактерот. На пример, кога некое лице станува апатично и ја губи способноста за преземање иницијатива, тоа има големо влијание врз неговото физичко и ментално здравје. Друг знак на деменција се проблемите со пишувањето, читањето и зборувањето. Лицето во раните фази на деменција може да има проблем да ги најде вистинските зборови за време на разговорот или да има проблем да разбере што зборува другата личност.
