Високи нивоа на Т-клетки, кои се развиваат по изложување на коронавирус што предизвикува обична настинка, може да пружат заштита од КОВИД-19, покажала студија на Имериал Колеџот во Лондон, која беше објавена вчера. Експертите сметаат дека истражувањето може да отвори нови патишта за вакцините од втора генерација.
Имунитетот против КОВИД-19 е сложен и се верува дека, иако постојат докази за намалување на нивоата на антитела шест месеци по вакцинирањето, Т-клетките исто така играат витална уога во обезбедувањето на заштита од вирусот.
Со студијата, која започна во септември 2020 година, биле проучувани нивоата на Т-клетките што се резултат на претходна обична настинка кај 52 контакти во домаќинството со позитивни случаи на КОВИД-19 набрзо по изложување на испитаниците на тој вирус, за да се види дали развиле инфекција.
Утврдено е дека 26 лица, кои не развиле инфекција, имале значајно повисоко ниво на тие Т-клетки во однос на лицата кои се заразиле.
Научниците од Империал колеџот не информираа колку ќе трае таа заштита што ја пружаат Т-клетките.
“Откривме дека високите нивоа на постоечките Т-клетки што телото ги создава кога е заразено со други човечки коронавируси, како настинки, може да заштитат од инфекција со КОВИД-19“, изјави авторката на студијата д-р Риа Кунду.
Авторите на студијата, објавена во Nature Communications, изјавија дека внатрешните протеини на вирусот SARS-CoV-2 кои се мета на Т-клетките може да понудат алтернативен пат за производителите на вакцини.
Моменталните вакцини против коронавирусот што предизвикува КОВИД-19 целат на шилестиот протеин, кој редовно мутира, создавајќи варијанти, како што е омикрон, кои да намалуваат ефикасноста на вакцините против симптоматски инфекции.
“Спротивно на тоа, внатрешните протеини на кои целат заштитните Т-клетки што ги идентификувавме, мутираат многу помалку“, вели професорот Аџит Лалвани, коавтор на студијата.
“Следствено, тие многу помалку се разликуваат од една до друга варијанта на вирусот SARS-CoV-2, вклучително и омикрон. Поради тоа, новите вакцини што ги таргетираат овие внатрешни протеини би развиле сеопфатни одговори на заштитните Т-клетки кои би требало да штитат од сегашните и идните варијанти на SARS-CoV-2 “.
