Жештините, кои неколку дена се нормализирани, но не и спарното и тешко време, доведуваат до чувство на замор и немоќ. Советите на лекарите најлесно да се издржи овој период, се состојат од едноставни чекори кои секој од нас може да ги примени. Тоа значи, да внесуваме лесна храна, да се избегнува тешка физичка активност, да се внесуваат многу течности, но и да се внимава со клима уредите.
- ПИЈТЕ ТЕЧНОСТИ
Сите органи и клетки во телото бараат вода за правилно да функционираат, а истражувањата покажале дека слабата дехидрација може да има негативно влијание на расположението и на извршувањето едноставни задачи. Затоа, пијте многу вода и во дневното мени вклучете течности богати со електролити.
- ИСХРАНА
Понекогаш е толку жешко што немаме волја ниту да јадеме, но за енергијата да остане на потребното ниво, потребно е да се јаде барем по малку на секои 4-5 часа. Најдобар избор се лубеница, целер, портокали и зелени пиперки кои се полни со вода и други хранливи состојки. Комбинирајте ги со протеини за нивото на шеќерот во организмот биде стабилно. Избегнувајте пржена, похувана, слатка и пресолена храна, внесувајќи многу сезонско овошје и зеленчук.
- ВНИМАТЕЛНО СО КЛИМА УРЕДОТ
Бидете внимателни со наглото преминување од ладно на топло и обратно, и ова посебно важи за срцевите болни. Влегувањето во претерано климатизирана просторија предизвикува “стегање“ на крвните садови, а кобно може да биде и излегувањето од разладена просторија на жештина. Температурната разлика помеѓу климатизираниот и надворешниот простор не смее да биде поголема од седум степени.
- ТУШИРАЊЕ
Туширајте се со млака вода. Носете лесна широка светла облека од природни материјали. Ако излегувате од дома носете шапка и очила за сонце. Сепак, најпаметно е, ако не морате, да не излегувате помеѓу 10 и 17 часот.
