Колку и сите да се радуваме на пролетта, за многумина доаѓањето на првите топли денови значат и маки со желудникот. Имено, во пролет обично се јавуваат или се влошуваат гастроинтестиналните проблеми, особено гастритис, жиговина или синдром на нервозни црева. Пролетта не е причината за проблемот во вистинска смисла на зборот, туку фактор кој ја влошува состојбата или “капка што ја прелева чашата“, заедно со останатите ризик фактори како што се нездравата исхрана, склоноста кон прејадување, стрес или пушење.
СТРЕС ЗА ОРГАНИЗМОТ
Сепак, докажано е дека промената на годишните времиња, односно доаѓањето на пролетта може да поттикне одредени хормонални активности и активности на нервниот систем кои го поттикнуваат лачењето на киселина во желудникот, а таа е главниот проблем при гастритис и гастроезофагеален рефлукс. Постои уште една причина зошто гастритисот или, на пример, чиревите често се активираат во пролет. Промената на годишните времиња е стресна за организмот, што доведува до слабеење на природните одбранбени функции. Тоа добро го искористува бактеријата хеликобактер пилори која во вакви услови полесно и побрзо се размножува и создава проблеми.
Во такви околности, неколку цигари премногу или неколку дена неправилна исхрана се доволни за брзо ширење на оваа бактерија во слузницата на желудникот. Ако страдате од желудочни тегоби, најдобар начин да се подготвите за доаѓањето на пролетта е да го зајакнете имунитетот со храна и доколку е потребно и со суплементи и малку да ги прилагодите навиките во исхраната: џвакајте подолго и побавно и воведете пообилен појадок и полесна вечера.
Изборот на храна треба да се следи во текот на целата година, особено ако сте склони кон гастритис, но доколку претходно не сте воделе сметка за тоа, напролет дефинитивно треба да вклучите што повеќе зеленчук и свежо овошје во менито и да ја исфрлите пржената храна и пијалоците со кофеин.
