Во денешно време кога луѓето се повеќе време поминуваат пред своите компјутери, таблетите и мобилните телефони, се појави проблем со очите што досега не постоеше. Главните симптоми кои се јавуваат се заматен вид, напнатост во очите, суво око, болки во пределот на вратот и рамената, како и главоболки. Понекогаш се јавуваат и вртоглавици и двојна слика… Пречките обично се поврзани со должината на времето поминато пред компјутерот. Симптомите можат да се појават заради слаба или погрешно поставена светлина, блескање на екранот, неправилна положба на главата и телото, несоодветна оддалеченост на екранот или погрешни корекции. Поголемиот дел од проблемите исчезнуваат откако ќе престанете да гледате во екранот. Но во некои случаи и по престанувањето на работата на компјутер останува матниот вид во далечина.
Личностите кои имаат некои од наведените симптоми треба да појдат на офталмолог на преглед. По земената анамнеза и направениот офталмолошки преглед може да се постави дијагноза – синдром на компјутерски вид.
За да се надмине овој проблем препораката е да се набават очила за работа на компјутер со соодветна диоптрија и леќи кои ги имаат потребните заштитни слоеви (антирефлексен слој, боја и затемнување).
Исто така, потребно е да се прилагоди оддалеченоста и положбата на екранот (препорачаната положба е 12-20 степени под линијата на погледот), осветлувањето не смее да удира директно во очите или екранот, а држењето на телото и главата треба да биде исправено, со повремено земање пауза за одмор на очите.
