Пишува: Ведрана Дучкиќ
Нутриционист
Донесете здрави одлуки и почнете со здрави навики уште денес. Промената на начинот на исхрана и усвојувањето на здрави прехранбени навики е особено важна и е клучна во грижата за здравјето.
Основно начело на здравиот начин на исхрана е да се има редовни оброци, да се биде во се умерен и акцент да се стави на квалитетот на намирниците што ги конусмираме.
ЗНАЕТЕ ЛИ ШТО ЈАДЕТЕ?
Важно е да се освести што и колку јадеме, кои се тие нутриенти кои го градат нашето тело, го чуваат имунитетот, поволно делуваат на сите системи во телото и кои го регулираат метаболизмот и го доведуваат телото во состојба на рамнотежа.
Здравиот начин на исхрана подразбира внес на намирници од сите групи, внес на разновидно сезонско овошје и зеленчук, мешунки, полнозрнести житарки, јаткасти плодови и семки, риба, јајца, месо од живина, билни масла и нискомасни млечни производи.
Умереност се препорачува во консумирањето на црвено месо, животински масти и месни преработки, полномасни млечни производи и сета рафинирана храна и кондиторски производи.
Внесувајте намирници богати со антиоксиданти, витамини и минерали, диетални влакна и не заборавајте да консумирате доволно течности.
Ако имате прекумерна телесна тежина или боледувате од некоја хронична болест, следењето на индивидуално прилагоден план на исхрана и намалување на вишокот килограми, гарантирано ќе го подобри вашето здравје.
ОСЛОБОДЕТЕ СЕ ОД ВИШОКОТ КИЛОГРАМИ И ПРЕСТАНЕТЕ ДА ПУШИТЕ!
Намалувањето на килограмите ќе помогне во регулирање на крвниот притисок, намалување на ЛДЛ холестеролот и триглицеридите во крвта, ќе помогне во регулација на шеќерот во крвта и ќе го подигне нивото на енергија и квалитет на живот. Тоа значи дека одлуката да ја намалите телесната тежина може да биде прв чекор во грижата за здравјето.
Престанете да пушите, избегнувајте прекумерен внес на алкохол, досолување на храната, внимателно бирајте го начинот на подготовка на храната и избегнувајте подготовка со пржење и поховање. Од дневното мени исфрлете ја сета масна и слатка храна. Планирајте и не ги прескокнувајте оброците, задолжително појадувајте, носете со себе здрав ручек на работа или меѓуоброк.
Купувајте намирници со проверен квалитет, по можност домашна и свежа сезонска храна од еколошка средина. Движете се повеќе, оти физичката активност го забрзува метаболизмот и помага во регулирање на телесната маса.
