Во рамки на истражувањето, кое било презентирано на состанокот на Американската здравствена асоцијација за епидемиологија и превенција, биле набљудувани повеќе од 100 000 луѓе во три различни студии, кои најмалку два пати неделно јаделе бифтек, пилешко или риба на скара.
Научниците откриле дека луѓето кои го подготвуваат месото на скара повеќе од 15 дена во месецот, имаат 17 отсто поголем ризик за развој на висок крвен притисок од луѓето кои така подготвената храна ја консумирале помалку од четири пати месечно.
Покрај тоа, оние кои сакаат да јадат месо на скара, кое е попечено или препечено, имаат 15 отсто поголем ризик од појава на висок притисок, во однос на оние кои го готвеле месото на пониски температури.
Разликите во крвниот притисок може да се појават поради хемикалиите кои настануваат кога протеинот во месото е изложен на високи температури, претпоставуваат научниците. Иако е важно да се нагласи дека овие резултати не докажуваат дека самиот начин на подготовка на месото директно предизвикува зголемување на крвниот притисок, научниците советуваат претпазливост при подготовка на скари, кои се вообичаени за летниот период од годината.
