Имајќи го предвид фактот колку е важен сонот за доброто здравје би било добро да се обидете да спиете барем 7 часа во текот на ноќта. Сепак, доколку повремено имате проблем да заспиете, постојат вежби за дишење со чија помош полесно и побрзо ќе потонете во сон. Наједноставната вежба се изведува на следниот начин: најпрвин полека длабоко вдишете и потоа издишете, до крај; притоа обидете се да фокусирате на тоа како се чувствувате додека го изведувате ова. Повторете неколку пати, потоа продолжете да издишувате, притоа внимавајте издишувањето да трае двојно повеќе од вдишувањето. Повторете 3-5 пати.
Следната техника се вика вежба 4-7-8 дишење. Почнете така што низ благо отворената уста потполно ќе издишете. Потоа затворете ја устата и тивко низ носот вдишете додека броите до 4. Задржете го здивот додека броите до 7, а потоа издишете на уста додека броите до 8. Повторете го ова 4 пати, а после некое време можете постепено да го зголемувате траењето на броењето се до 8.
Третата вежба спаѓа во јога техниките на дишење – станува збор за наизменично дишење, прво низ едната, па низ другата ноздра. Седнете удобно, опуштете ја вилицата, главата, рамената и обидете се да се ослободите од каква било тензија. Приближете ја десната дланка кон лицето и благо ставете го палецот од десната рака врз десната ноздра, а домалиот прст на левата ноздра. Прво со палецот нежно затворете ја десната ноздра и нежно, потполно изишете на левата ноздра. Додека десната е се уште затворена, длабоко вдишете на левата. Потоа нежно затворете ја левата со домалиот и малиот прст, додека истовремено го подигнувате палецот од десната ноздра. Издишете на десната и кусо причекајте. Вдишете длабоко на десната ноздра, па затворете ја и истовремено тргнете ги прстите од левата. Издишете на левата. Повторете го овој циклус уште два пати.
Можете да ги пробате сите овие вежби за да видите која најмногу ви годи. Секако, се препорачува за време на нивното издведување да ги затворите очите и да се фокусирате на дишењето и на тоа како се чувствувате.
Инаку, на квалитетот на сонот влијае и исхраната – одделни намирници дури неповолно влијаат на спиењето, па би било добро да ги одбегнувате во втората половина од денот.
