Доколку сакате да ги зацврстите ноктите и да го забрзате нивниот раст би требало да јадете храна богата со протеини. Протеините се неопходни за производството на кератин, кој заедно со калциумот, селенот, сулфурот и калиумот ги гради ноктите. Меѓу најдобрите извори на протеини спаѓаат: месото, млечните производи, јајцата, рибите, мешунките, семките и јаткастите плодови.
За здрави нокти важен е и внесот на витамини од Б-комплексот, и тоа особено биотинот кој игра важна улога во производството на кератин во организмот. Јагодите, малините, бадемите, оревите и другите јаткасти плодови, како и месото, јајцата и рибата претставуваат добри извори на биотин. Доволниот внес на витамин Б 12, исто така, е битен за убав изглед на ноктите, а со овој витамин најбогат е црниот дроб, потоа скушата, сардините, лососот и црвеното месо (телешко, говедско, јагнешко и свинско).
Варивото од коприва (како и чајот од оваа билка), исто така, може да ви помогне да ги зајакнете ноктите. Копривата претставува добар извор на минерали како што се калциумот, манганот, железото и калиумот кои се неопходни за јаки и убави нокти.
