Вртоглавицата што се појавува кога од седечка или од лежечка положба лицето нагло ќе се исправи е состојба која е позната како ортостатска хипотензија, Станува збор за разлика во крвниот притисок, односно брзински пад на крвниот притисок. Често е благо изразена и трае неколку секунди по станувањето.
Ваквата ортостатска хипотензија повремено се случува кај многу луѓе. Но, доколку вртоглавицата се случува често и трае подолго од неколку минути при секое нагло станување, тоа може да биде аларм за некој посериозен здравствен проблем.
Постојат многу причини за појава на вртоглавица при станување од седечка или од лежечка положба, но некои од тие може лесно да се елиминираат. Ова се некои од причинителите за појава на ортостатска хипотензија:
Проблеми со срцето
Различни срцеви проблеми можат да доведат до чувство на вртоглавица и пад на крвниот притисок. Слабата работа на срцето, срцев напад или проблем со срцева инсуфициенција можат да предизвикаат вртоглавица при станувањето. Единствен начин за да бидете сигурни што точно се случува со вашето тело е да поразговарате со вашиот лекар и да ги направите потребните тестирања.
Некои лица, особено повозрасните, може да доживеат нагло намалување на крвниот притисок веднаш по оброкот. Ова може да биде една од причините за повремено чувство на вртоглавица при нагло станување од маса. Некои лекови, како што се диуретиците, алфа и бета блокаторите и многу други, може да направат поремтување со крвниот притисок.
Дехидратација
Кога телото нема доволно течности, постепено започнува да се губи волуменот на крвта. Ова може да придонесе за намалување на крвниот притисок при станување, што доведува до појава на вртоглавица. Дехидратацијата може да биде предизвикана од недоволен внес на течности, при дијареа или повраќање или при напорни тренинзи на професионални спортисти.
Пореметувања на нервниот систем
Некои од пореметувањата на нервниот систем можат да го отежнат регулирањето на крвниот притисок. Состојбите како што се деменција, Паркинсова болест или слично, можат сериозно да ја пореметат регулацијата на притисокот која би требало да биде под надзор на лекар. И лековите кои се користат за лекување на депресијата, психотични пореметувања, еректилна дисфункција и Паркинсова болест може да доведат до проблеми со вртоглавица. Мускулните релаксанти и наркотиците, исто така, може да имаат ист ефект.
Бременост
Во бременоста волуменот на крвта се зголемува, па така крвниот притисок може да падне одеднаш и ненадејно. Сето ова е причина поради која вртоглавицата при станувањето е сосем нормална за бремените жени.
