Постојат луѓе чиј праг на толеранција на болката е висок, па не се „потресуваат“ при појава на овој симптом, но има и од оние другите, хипохондриците кои мислат дека секоја болка е причина за итна реакција. Иако најчесто грешат, добро е да се знае дека постојат болки кои навистина не треба да ги игнорирате и мора да појдете на лекар.
Интензивна главоболка
Острата болка во главата, онаа со силен интензитет, не смеете да ја игнорирате, бидејќи може да биде знак за внатрешно крвавење како последица на аневризма, што може да заврши со смрт.
Непријатно чувство во градите, рамената и рацете
Може да биде првиот симптом за срцев удар или, пак, симптом за воспаление на белите дробови. Повеќето луѓе грешат кога мислат дека болката која е предвесник на срцевиот удар е силна, таа најчесто започнува со чудно чувство во градите. Пред срцевиот удар најчесто човек почнува да чувствува болка во рамената, рацете и во делот околу срцето, а ако притоа тешко можете да земете воздух веднаш упатете се на лекар.
Болка во долниот дел од грбот
Најчесто причината за оваа болка е артритисот, но не смеете да ја исклучите можноста од срцев удар и проблеми со абдоменот. Една од опасностите е пукање на аортата. Доколку подолго време страдате од висок крвен притисок, а болката постојано се зголемува, одете на лекар.
Силни болки во стомакот
Најчеста причина за остра болка во стомакот е воспаление на слепото црево кое се наоѓа помеѓу колкот и папочната врвца од десната страна. Доколку местото стане чувствително на допир и почне да ви се грчи ногата веднаш појдете на лекар, затоа што постои опасност слепото црево да пукне.
Болка во листовите на нозете
Една од најмалку познатите опасности е длабоката венска тромбоза, тоа се грутчиња крв кои најчесто се појавуваат во нозете. Тромбозата може да биде опасна по живот, затоа ако забележите оток на листовите на нозете придружен со болка, време е за проверка.
Боцкање во стапалата
Хроничното боцкање во стапалата често се јавува кај дијабетичарите, а можно е истото да е предизвикано и од недостаток на витамин Б, болести на бубрезите, слаба циркулација, како и болести на крвните садови.
Болка во стомакот придружена со надуеност и проблеми со варењето
Ако ви се менува апетитот, а покрај тоа чувствувате и непријатност во стомакот подолго од две недели, појдете на лекар. Тоа се најчестите симптоми на рак кои пациентите не ги забележуваат.
