Во Германија, лицата постари од 60 години можат по четврти пат да се вакцинираат против коронавирусот. Меѓутоа, вирологот од Есен, Улф Дитмер предупредува дека пречестото вакцинирање може да го промени имуниот систем.
Вирологот проф. д-р Дитмер советува да не се вакцинирате секои три месеци за да ги избегнете барањата за носење маска или тестирање.
“Доколку толку често го повторувате вакцинирањето, може да дојде до промени во имуниот систем“, предупредува лекарот во интервјуто за “Kölnische Rundschau”.
Тоа го покажале и првите податоци. “Мислам дека има смисол да се довакцинира за следната зима, но не на секои три месеци“, вели д-р Дитмер.
За идните вакцинација против коронавирусот, тој им препорачува на пациентите да почекаат додека не бидат достапни вакцини (Фајзер и Модерна) кои се прилагодени на омикрон варијанта.
“Тоа се двовалентни вакцини, ја содржат старата вакцина и адаптирана варијанта и поттикнуваат широк имунолошки одговор на сите претходни варијанти. Значи, би чекал до септември или октомври тие вакцини да бидат достапни на пазарот и тогаш би се вакцинирал за зимската сезона“, потенцира вирологот.
Според податоците на научникот, генетските промени во коронавирусот е тешко да се предвидат.
“Но, мислам дека теоријата дека на есен и во зима ќе имаме вирус со слична сериозност како делта варијантата е малку веројатна“, додава проф. д-р Дитмер.
