Британските лекари веруваат дека ја утврдиле причината за неодамнешните мистериозни проблеми со воспаленија на црниот дроб кај децата. Истражувањата, како што наведуваат научниците, покажале дека причинители се два вируса кои инаку не предизвикуваат проблеми во организмот.
Во последните неколку месеци, повеќе од 1.000 деца, во голем дел помали од пет години, во 35 земји имаа воспаление на црниот дроб од непознато потекло, а на некои од нив им беше потребна трансплантација.
Два тима истражувачи од Лондон и Глазгов заклучија дека децата, поради рестрикциите воведени за време на пандемијата со КОВИД, многу подоцна од вообичаено, дошле во контакт со два вообичаени вируси, на кои не стекнале имунитет кога требало.
Станува збор за аденовирус, кој предизвикува блага настинка и евентуално благи дигестивни проблеми и за адено-придружен вирус, кој што инаку не предизвикува болест и потребен му е “помошен вирус“, како што е аденовирус, за да се размножува.
Во нормални околности, децата многу брзо се опоравуваат од овие вируси, но сега тие, во некои случаи, предизвикаа сериозни воспаленија на црниот дроб.
Научниците ја исклучија можноста дека за оваа болест е виновен кронавирусот или вакцината против него и заклучија дека за таквиот развој на болеста улога игра генетската наследност.
“Поради долгото затворање и карантини за време на пандемијата, децата не се дружеа и не ги пренесуваа овие вируси едни на други, така што не стекнаа имунитет на овие вообичаени инфекции во времето кога требаше“, објаснува вирусологот, проф. д-р Џудит Бојер.
Кога се укинаа ограничувањата, додава таа, децата повторно почнаа да се дружат и одеднаш беа изложени на вируси и низа инфекции на кои не стекнале имунитет, како што е тоа вообичаено.
Проф. д-р Ема Томпсон, која го водеше истражувањето во Глазгов, вели дека станува збор за важни сознанија, но предупредува дека останале уште многу неодговорени прашања.
“Потребни ни се дополнителни истражувања за подобро да сфатиме каква точна улога имал адено придружениот, асоциран вирус два во овие заболувања на црниот дроб кај децата“,изјави проф. д-р Томпсон.
