Многу луѓе се обидуваат да ја намалат својата телесна тежина со намален внес на масти и јаглехидрати, а зголемен внес на протеини во својата исхрана. Затоа некои почнуваат да ги консумираат претерано, во неограничени количини, па оттука се поставува прашањето колку тоа всушност е добро за нашето здравје?
Зошто протеините се добри за нас?
Протеините заедно со водата се најважните супстанци во нашето тело и се клучни за растот и развојот на сите ткива, особено на мускулите. Затоа е од суштинско значење да ги внесуваме во соодветни количини. Според новата студија, нутриционистите велат дека не е важно само доволен внес на протеини во телото, туку се битни и намирниците преку кои ги внесуваме. Причината е едноставна, секој извор на протеини, од пилешко месо до кикиритки, се состои од различни аминокиселини од кои се изградени протеините. Од 20 видови на аминокиселини, девет од нив се потребни за нашиот организам, а истите не се наоѓаат во еднакви количини во храната богата со протеини. Протеините се разградуваат поспоро од јаглехидратите, па чувството на ситост по јадењето трае многу повеќе отколку кога јадеме само јаглехидрати. Протеини ни помагаат да изгубиме што помалку мускулно ткиво во процесот на слабеење и држење на диети. Освен тоа кога ќе се одлучиме за зголемен внес на протеини, тоа вообичаено значи и помал внес на нездрава храна и рафинирани јаглехидрати.
Нутриционистите велат дека не е важно само доволен внес на протеини во телото, туку се битни и намирниците преку кои ги внесуваме
Меѓутоа, и со внесот на протеини во нашата исхрана може да се претера. Факт е дека и протеините содржат калории: еден грам протеин има околу четири калории. Оттука, ако претеруваме со консумација на протеини, многу лесно може да дојде до калоричен суфицит, а тоа ќе резултира со вишок на килограми.
Што се случува со вишокот на протеини во нашето тело?
Протеините се навистина добри за нашето тело бидејќи се основа за изградба на ткивата, но поголема количина на протеини не значи и повеќе корист за организмот. Ако јадеме повеќе протеини (т.е. внесуваме повеќе калории) отколку што ќе потрошиме во текот на денот, вишокот ќе се складира како масно ткиво. Имено, протеините во нашиот организам се разградуваат на аминокиселини и амонијак. При разградбата остануваат делови од јаглерод кои се претвораат во глукоза. Глукозата нашето тело ја користи за енергија, а доколку телото веќе е заситено со глукоза и нема повеќе простор за складирање во форма на гликоген во нашите мускули или црн дроб, вишокот ќе се складира во форма на масни наслаги.
Поради сето ова, важно е да не се претерува со внесот на протеини. Треба да знаеме колку калории ни се потребни секој ден и да го усогласиме своето мени така што до 35 % од дневниот внес на калориите да го добиеме од протеините. Што се однесува до калориите, на жените им е потребен секојдневен внес помеѓу 1 600 и 2 400 калории, а на мажите помеѓу 2 000 и 3 000 калории. Ако сакате да се ослободите од вишокот на масните наслаги, намалете го внесот на калори за 250 – 400 калории дневно. Доколку, пак, сакате да го спречите претераното успорување на метаболизмот, имајте на ум дека жените никако не би смееле дневно да внесуваат помалку од 1 200 калории, а мажите помалку од 1 800 калории.
