Високиот крвен притисок станува се поприсутен меѓу луѓето, што може да се припише на високо стресниот начин на живот и лошата исхрана. Многу заболени не се и нема да бидат свесни дека имаат хипертензија бидејќи таа не предизвикува очигледни симптоми од моментот кога ќе се развие. Единствениот начин да откриете дали имате висок крвен притисок е редовно мерење.
140/90 mmHg и сите вредности над тоа (или 150/90 mmHg ако сте над 80 години) треба да бидат причина за загриженост. Секако, најдобро е да продолжите редовно да го контролирате притисокот и веднаш да се јавите кај вашиот лекар доколку вредностите ви се покачени, дури и ако се чувствувате добро и немате симптоми, со оглед на тоа што кога ќе се развијат симптомите, можеби е предоцна. Сепак, доколку забележите некој од следните предупредувачки знаци, побарајте лекарска помош што е можно поскоро, односно пред високиот крвен притисок да предизвика посериозно оштетување во организмот.
- Главоболки
Еден од првите знаци на висок крвен притисок на кој треба да внимавате е нагло зголемување на зачестеноста на главоболките. Повремените главоболки се нормална појава, ако тие се јавуваат секоја недела, па дури и секојдневно, треба да разговарате за ова со вашиот матичен лекар.
- Замор и вртоглавици
Ако се чувствувате уморни дури и по окрепувачкиот ноќен сон или повремено имате вртоглавици, ова може да се должи на покачен крвен притисок. Ова е знак дека нема доволно кислород во телото или дека крвта е контаминирана со токсини поради нарушена функција на бубрезите предизвикана од хипертензијата.
- Лош вид
Лицата со висок крвен притисок може да забележат дека видот им е ослабен поради оштетувања на крвните садови во нивните очи, што значи дека не доаѓа доволно крв во мрежницата. Оваа состојба се нарекува хипертензивна ретинопатија и често е придружена со заматен вид или двојни слики.
- Болка во градите
Високиот крвен притисок го зголемува ризикот од срцев удар, мозочен удар или срцева слабост. Може да предизвика оштетување на артериите со тоа што ги прави покрути и така го намалува протокот на крв и снабдувањето со кислород во срцето, што резултира со болка во градите која може да се шири во грбот, вратот, вилицата, рамената и рацете.
- Крв во урината
Појавата на крв во урината е знак за оштетување на бубрезите и/или на уринарниот тракт поради висок крвен притисок. Бубрезите се одговорни за лачење на хормон кој помага во регулирањето на крвниот притисок, наречен алдостерон, така што оштетувањето на бубрезите може да доведе до висок крвен притисок и смрт доколку не се лекува.
ТИВОК УБИЕЦ
Постојат уште неколку други симптоми што може да ги искусат лицата со покачен крвен притисок, вклучувајќи крварење од носот, отежнато дишење, потење, црвенило и палпитации. Комбинациите на симптоми предизвикани од висок крвен притисок варираат од личност до личност и секој човек има различен праг на толеранција, односно колкава штета може да издржи неговото тело пред високиот крвен притисок да стане опасен по живот. Некои луѓе немаат никакви симптоми, поради што високиот крвен притисок се нарекува тивок убиец. Во секој случај, хипертензијата не треба да се сфаќа лесно, крвниот притисок треба редовно да се следи за да бидете сигурни дека е во нормални граници и, доколку вредностите се покачени, веднаш да се јавите кај вашиот лекар.
