Што претставува прееклампсијата?
Прееклампсијата е комплексно пореметување кое влијае на 3 до 8 проценти од бремените жени. Жените се дијагностицираат со прееклампсија ако имаат висок крвен притисок, протеини во урината и отоци после 20 недела од бременоста. Прееклампсија е можна и пред 20 недела, но само во ретки случаи, како што е моларната бременост.
Прееклампсијата најчесто се јавува по 37 недела од бременоста, но може да се развие во кој било момент во текот на втората половина од бременоста, вклучувајќи го и породувањето, па дури и по породувањето – обично во првите 48 часа. Прееклампсијата може да варира од блага до тешка и може да напредува побавно или побрзо.
Се смета дека прееклампсијата е најверојатно последица на одредено нарушување во постелката и претставува сериозна закана за намалување на дотокот на крв од мајката до плодот.
Колку е потешка состојбата и е порано во текот на бременоста, ризиците се поголеми за мајката и бебето.
Kога се работи за тешка прееклампсија, таа може да влијае на многу органи и да предизвика сериозни или дури и опасни по живот проблеми. Затоа трудницата мора да се породи порано ако состојбата е тешка или се влошува
Прееклампсијата предизвикува крвните садови да се стегаат, што резултира со висок крвен притисок и намален проток на крв, кој може да влијае на органите во целото тело, вклучувајќи го црниот дроб, бубрезите и мозокот.
Последиците од прееклампсија вклучуваат недостиг на проток на крв во постелката, а кога постелката не добива доволно крв, бебето не добива доволно кислород и хранливи материи што може да значи проблеми, како што е слаб раст, премалку плодова вода, како и абрупција на постелката (кога постелката се одвојува од ѕидот на матката пред породувањето).
Промените во крвните садови предизвикани од прееклампсија може да предизвикаат „протекување“ на течноста во ткивата. Тоа резултира со отоци, познати како едеми.
