Носењето високи потпетици ја поместува линијата на рамнотежа и создава оптоварување на одредени делови од телото, што резултира со болка, деформација, дегенеративни промени, компромитирање на нерви и други структури.
Лумбалната лордоза (закривување на долниот дел од грбот) се зголемува, карлицата ротира кон напред, колковите се движат зад правилната постурална линија, а колената пред таа линија. Колку е повисока потпетицата, толку е поголем притисокот на предниот дел на стапалото што влијае на создавање промени во неговиот преден дел.
Последиците од носење високи потпетици, но и тесни чевли, се манифестираат со појава на различни патолошки последици како што се:
Hallux valgus е најчестата коскена деформација во пределот на стапалата како резултат на тесни обувки и високи потпетици. Станува збор за прогресивна деформација која подразбира искривување на палецот на стапалото настрана или латерална девијација, поместување на првата метатарзална коска кон внатре. Овој деформитет може да резултира со екстремно силна болка и вкочанетост на прстите.
Повреда на глуждот – станува збор за честа траума која се јавува при носење на чевли со високи потпетици. Ахиловата тетива во високи потпетици прилично се скратува и станува ранливо место за појава на повреди. Заедно со ахиловата тетива, се скратува и триглавиот мускул на потколеницата. Се јавува лоша циркулација и појава на болки во потколеницата.
