Според резултатите од една американска студија жените со нормална телесна тежина кои претежно консумираат храна богата со калории имаат поголем ризик од повеќе видови на карциноми, кои можат да се доведат во врска со гојазноста.
Во студијата учествувале 92 000 жени и утврдено е дека жените кои консумираат висококалорична храна сиромашна со нутритиенти, како што се чипсот и останатите грицки, брзата храна и слатките, имаат за 10 проценти поголем ризик од карциноми кои често ја следат гојазноста, како што се рак на дојка, јајници, матка, дебело црево и бубрези.
Едно од објаснувањата кои ги наведуваат стручњаците е фактот дека личностите кои јадат прилично големи количества храна од овој тип, јадат помалку растителни намирници како овошје, зеленчук, интегрални житарки и мешунки, а токму овие намирници содржат влакна, витамини, минерали и други нутритиенти, кои го намалуваат ризикот од одредени видови карцином.
Авторите на студијата, меѓутоа немаат конкретно објаснување за тоа што зголемен ризик е забележан и кај жени кои немаат вишок килограми, но го нагласуваат значењето на поголем внес намирници со растително потекло и ограничувањето на висококалоричната храна, со цел превенција од карцином и други болести.
