За да го испитаат влијанието на пиридоксин-хидрохлорид (витамин Б6) врз сонот, австралиските научници спровеле истражување во кое учествувале 100 испитаници. Во период од пет последователни дена, една група од испитаниците земала 240 мг витамин Б6 пред спиење, додека другата (плацебо) добивала комплекс од различни витамини од Б-групата (вклучувајќи и исто количество витамин Б6). После 5 дена авторите на студијата констатирале дека витаминот Б6 (кога се зема сам) битно го зголемил бројот на соништата на кои учесниците во истражувањето се сеќавале. Тие, исто така, заклучиле дека овој витамин не доведува до поживописни или невообичаени соништа, иако одделни претходни студии укажувале на овој придружен ефект.
Според сведочењето на одделни испитаници од првата група, соништата станале појасни и полесни за памтење, и делови од нив не се губеле од сеќавањата како што поминувал денот. Од друга страна, кај испитаниците од втората група, кои добивале комплекс од витамини од Б групата, забележан е плош квалитет на сонот и утрински замор, за што авторите на студијата напоменуваат дека без понатамошни истражувања не е можно да се знае, и точно кои, витамини од Б групата неповолно влијаеле на квалитетот на сонот на испитаниците од оваа група.
Друга постара студија, пак, (од 2007 година), исто така, укажала на неповолното влијание на земањето мултивитамински суплементи пред спиење врз севкупниот квалитет на сонот, како и на зачестеноста на будењето во текот на ноќта.
