Високите дози на витамин Д во форма на додаток на исхраната може да поттикнат зголемување на телесната тежина и развој на јазичните и моторни вештини кај неухранети деца, покажало заедничкото истражување на британските и пакистанските научници, пишува магазинот „American Journal of Clinical Nutrition“.
Познато е дека витаминот Д е многу важен за здравјето на коските и мускулите, а може да ве заштити и од настинки и грип. Но новото истражување открива дополнителни предности. Имено, станува збор за прво истражување на луѓе кое се занимава со влијанието на витаминот Д на развојот на мозокот.
Во истражувањето учествувале 185 деца на возраст од 6 до 58 месеци. Истражувањето покажало дека по осум недели, додатоците на витамин Д довеле до значајни подобрувања во телесната тежина. Исто така дошло и до подобрување на моторните вештини, јазикот и општиот развој.
Новите резултати до кои дошол тимот истражувачи од „Queen Mary University of London“ и „University of Punjab“, би можеле да го сменат текот во справувањето со тешката акутна неухранетост, која зафаќа околу 19 милиони деца на возраст под 5 години во светот.
Научниците истакнуваат дека е потребно да се повтори истражувањето, но со пониски дози на витамин Д за да се утврди дали и помалите дози доведуваат до зголемување на телесната тежина и развојот на мозокот. Во истражувањето не биле детектирани никакви негативни несакани ефекти, предизвикани од високата доза на витамин Д, но не се исклучени, па научниците повикуваат на претпазливост.
На крајот треба да се истакне дека истражувањето се однесува само на децата кои страдаат од тешка акутна неухранетост, а не на здравите деца.
