На многумина голем проблем им претставува вишокот масти на стомакот, кој не можат да го решат со години, а тој мошне често е знак за проблеми со срцето. Меѓутоа салото во пределот на стомакот, исто така, е и обележје за недостаток на еден од витамините неопходни за добро здравје.
Имено, истражувањето на Универзитетот во Амстердам докажало дека личностите со вишок килограми и преголемо количество масно ткиво на стомакот имаат недостаток на витаминот Д. Меѓутоа се уште не е јасно дали недостатокот на витаминот Д доведува до насобирање на масно ткиво на подрачјето на абдоменот или дебелината го намалува неговото ниво. Претходните истражувања докажале дека витаминот Д го намалува ризикот од појава на болести како што се артритис, астма и дијабетес тип 1, благодарение на неговите противвоспалителни и својства за јакнење на имунитетот.
„Големата поврзаност меѓу поголемите количества масно ткиво на стомакот и намалените количества на витамин Д упатува на тоа дека кај личностите со преголем обем на половината постои поголем ризик од недостаток на витамин Д“, вели авторката на студијата д-р Рашида Рафик од Универзитетот во Амстердам.
Студијата е спроведена така што научниците го анализирале абдоминалното и вкупното масно ткиво кај луѓето на возраст од 45 до 65 години, кои учествувале во претходни истражувања за дебелината. Кај испитаниците се проценувале и нивоата на витамин Д. Колку витаминот Д, познат и како витамин на сонцето, е важен за здравјето говори и фактот дека овој скапоцен витамин може да спречи, па дури и да поправи штета на срцето предизвикана од дијабетес и висок крвен притисок. Некои стручњаци дури и тврдат дека витаминот Д е евтина алтернатива на лековите кои инаку се користат за болести на срцето.
Витаминот Д делува на тој начин што го поттикнува производството на азотна киселина важна за регулирање на крвотокот и спречување на создавање крвни згрутчувања. Исто така, го намалува „внатрешниот стрес“ во кардиоваскуларниот систем, што, исто така, делува поволно на здравјето на срцето.
„Не постојат многу, ако воопшто ги има, познати системи кои можат да се користат за регенерација на оштетените кардиоваскуларни клетки, но витаминот Д тоа го може. Ова е прилично евтино решение за „поправка“ на кардиоваскуларниот систем. Не мораме да развиваме нов лек, туку веќе го имаме“, тврди д-р Тадеуш Малински од универзитетот во Охајо.
Витаминот Д е особено корисен за здравјето на жените. Науката докажала дека внесувањето на витамин Д преку храната и додатоците во исхраната ја намалува можноста за порана менопауза за 17 проценти. Се смета дека витаминот Д го забавува и стареењето на јајниците.
Најголем природен извор на витамин Д е сончевата светлина, а го има и во масната риба, жолчката и некои видови житарки. Некои млечни производи се засилени со витамин Д, па го има и во нив.
