Храната богата со витамин А како што е, на пример, зелениот, жолтиот и портокаловиот зеленчук би можела да го намали ризикот од слабеење на когнитивните функции (како што се памтењето и вниманието) на постари години. Имено, група кинески и канадски научници спровеле истражување во кое учествувале околу 330 испитаници, на просечна старост од околу 77 години. Се проценувале когнитивните способности на испитаниците, како и нивото на витамин А.
Се покажало дека 61 отсто од учесниците во експериментот имале нормално ниво на витамин А, 26 отсто имале благ недостаток, а 13 проценти сериозен недостаток на овој витамин. Испитаниците кај кои бил забележан недостаток на витамин А постигнувале полоши резултати на тестовите за умствени способности.
За да се спречи недостатокот на витамин А би требало секојдневно да јадеме намирници богати со витамин А како што се тиква, батат компир, моркови, спанаќ, кељ, блитва, брокули, домати, кајсии, праски, како и јајца, млечни производи, морска риба и рибино масло.
