Најголемиот број истражувачи се согласуваат со тврдењето дека психосоцијалните афктори влијаат на текот на атопискиот дерматитис и дека овие фактори се секундарни, а не примарни во етиологијата на болеста.
Емоционалната вознемиреност, стресот, тензичноста на работа или училиште или нестабилната и несигурна домашна атмосфера, може да доведат до егзацербација на атопискиот дерматитис.
Некои истражувачи укажуваат на фактот дека овие влијанија може да доведат до дисрегулација на автономниот нервен систем, абнормален васкуларен одговор и ослободување на инфламаторни медијатори коишто водат до егзацеребација на атопискиот дерматитис.
Од друга страна, пак, хроничното чешање, коешто е многу изрзено кај тешките форми на атописки дерматитис, предизвикува растројство на сонот, хипериритабилност и емоционално страдање, што придонесува за воспоставување негативен „circulus vitiosus“. Иако не се примарна причина за болеста, сепак, психосоцијалните фактори мора да се земат предвид кога се третираат егзацербациите на атопискиот дерматитис. Овие проблеми се многу важни, особено кај децата и адолесцентите, па често пати потребно е не само медицинска, туку и психолошка интервенција.
ПРОФЕСИЈА
Изборот на професијата може да има силно влијание врз текот на болеста кај некои возрасни пациенти со атописки дерматитис. Истражувањата покажале дека атопискиот дерматитис почесто се појавува кај лица чиишто професии се поврзани со честа изложеност на прав, волна, текстилни материјали или хемикалии. Сувата и хипериритабилна кожа кај пациентите со атописки дерматитис е склона на напукнување, десквамирање и почесто се воспалува по експозицијата на иританси. Поради ова, пациентите со атописки дерматитис и со висока изложеност на работно место на иританси, имаат чести или постојани егзацербации на болеста.
Студиите покажуваат дека 65-75 % од пациентите со атописки дерматитис имале егземи на рацете често поврзани со неспецифични иританси на работно место. Последиците од тешките егзацербации на АД кај пациентите што работат на високоризични работни места често се причина за промена на работното место со цел да се намали изложеноста на иританси и да се обезбеди квалитетен живот на тие пациенти.
Клучни карактеристики за дијагнозата:
- Не постои само еден показател за дијагностицирање на АД, затоа, дијагнозата зависи од целокупната евалуација;
- Морфологијта, дистрибуцијата, пуритусот и асоцираните атописки болести се многу важни карактеристики на физикалниот преглед;
- Лабораториските наоди за периферна еозинофилија, покачениот серумски IgE, позитивните алергиски тестови и позитивната провокација на храна можат да бидат маркери на болеста.
(Продолжува)
