Срцевиот удар е сериозен медицински итен случај и симптомите обично брзо се јавуваат. Главните знаци се болки и стегање во градите, вртоглавица и недостаток на воздух, но изостанувањето на посилни болки во градите може да биде главната причина зошто жените имаат многу повеќе непризнаени срцеви удари од мажите или се погрешно дијагностцирани и отпуштени од ургентните центри.
Според истражување објавено во списанието Circulation, помалку од една третина од жените пријавуваат непријатност во градите пред срцев удар, но исто така една третина од жените кои доживеале срцев удар, еден месец претходно чувствуваат некои од овие седум симптоми.
Обрнете внимание на нив:
- необичен замор (70 проценти)
- нарушување на спиењето (48 проценти)
- отежнато дишење (42 проценти)
- дигестивни пречки (39 проценти)
- анксиозност, промени во размислувањето (35,5 проценти)
- тешки/слаби раце или нозе (24,9 проценти)
- губење на апетит (21,9 проценти).
Студијата опфатила 515 жени на возраст од 29 до 97 години, со просечна возраст од 66 години, кои биле отпуштени од болница неколку месеци откако доживеале срцев удар. На жените им била покажана листа од 70 симптоми кои можеби ги искусиле во месеците пред срцевиот удар и од нив е побарано да ги оценат врз основа на зачестеноста и сериозноста.
Ризик фактори
Иако дијабетесот и пушењето се заеднички фактори на ризик за двата пола, жените со овие ризици имаат поголема веројатност да развијат срцеви заболувања од мажите. Покрај тоа, симптомите на срцев удар кај жените обично се поблаги, а жените честопати не се свесни за нив или ги минимизираат. Кај жените, класичниот симптом на силна болка во градите се јавува поретко, а почесто е присутно чувство на притисок или блага непријатност во градите и болка во други делови од телото, како што се болка во стомакот, рамената, рацете, како и појавата на мачнини, повраќање, недостаток на воздух, вртоглавица, ненадеен замор и слабост.
