Се проценува дека околу 15 отсто од луѓето патат од повремени мигренозни главоболки. Некои намирници како што се чоколадото, месните преработки и постарите сирења одамна знаеме дека можат да предизвикаат мигрена, но една неодамнешна студија на листата ’ризични’ намирници го стави и алкохолот – кој ги зголемува шансите за појава на мигрена кај личностите склони на овој проблем.
Во истражувањето учествувале 2197 испитаници кои повремено имале мигрени. Испитаниците пополниле прашалник кој се однесувал на нивната консумација на алкохол во период од три месеци.
Се покажало дека кај третина од испитаниците алкохолот доведувал до напади на мигрена во рок од само 3 часа. За 77 отсто од испитаниците најчест предизвикувач на мигрена било црвеното вино. После црвеното вино, алкохолни пијалаци за кои постои најголема шанса да предизвикаат напад на мигрена се белото вино, шампањското, пивото, вискито, румот и на крајот вотката. Се покажало и дека овој ефект од алкохолот често се појавува кај личностите со понизок индекс на телесна маса (под 18,5).
