Постојат голем број лекови кои ја зголемуваат чувствителноста на кожата на УВ зрачењето од сонцето (како и солариумот), па така ако планирате во следниот период повеќе време да поминете на отворено, а моментално сте на терапија, најдобро е да се консултирате со лекар или фармацевт и да проверите дали лековите кои ги пиете спаѓаат во оваа група.
Меѓу лековите кои можат да предизвикаат фотосензитивна реакција спаѓаат антибиотиците, лековите против акни, одделни цитостатици, диуретици и антихипертензиви, нестероидни антиинфламаторни лекови, антидепресиви, како и препарати со кантарион.
Затоа, она на што треба да внимавате е – доколку моментално користите некои од фотосензитивните лекови би требало да одбегнувате подолго изложување на сончеви зраци, како и да користите лосиони и креми за сончање кои обезбедуваат висок фактор на заштита од УВА и УВБ зраците.
