Се вели дека вагиналната микрофлора е чувар на женското здравје, а еве и зошто е така!
Што се случува кога е нарушена вагиналната микрофлора?
„Кога е нарушена вагиналната микрофлора се губи нејзината функција на природна бариера, па расте Пх вредноста и се јавуваат одредени болести. Вистина е дека на негата на лицето, рацете и косата посветуваме секојдневно внимание. За тоа со задоволство зборуваме со пријателките, разменувајќи искуства и препораки, а и се советуваме со бројни стручњаци. Свесни сме дека тие делови од телата се изложени на виделина и тие многу откриваат за нас. Но за интимната нега речиси и да не се зборува. Тоа се подразбира само по себе, без оглед на тоа што молчењето и претпоставките обликуваат цела низа погрешни навики“, велат стручњаците.
За негата и хигиената на интимните делови се зборува премалку и во гинеколошките ординации, иако негата и хигиената не значат само спречување на инфекциите, туку се и најактивна примарна грижа за психофизичкото здравје на жените.
Имено хигиената на секој дел од телото, па и интимното подрачје, е од пресудна важност за поддршката на самоодбраната на организмот, затоа што го поттикнува ситемот на самочистење кој, во случај на нормална функција, штити од причинителите на болести и без нашето свесно влијание.
Сè повеќе жени се борат со вагинални инфекции
Алармантни се статистичките податоци кои покажуваат дека природната заштита, односно урамнотежена вагинална флора имаат само 30 до 40 отсто од жените во репродуктивното доба. Иако голем број жени порано или подоцна се соочуваат со вагинална инфекција, само помал дел од нив заради тоа одат на гинеколог. Сепак, речиси сите порано или подоцна имаат проблем со вагинално воспаление, што речиси во секој четврти случај предизвикува и воспаление на мочниот меур.
Причината за големата зачестеност на воспаленијата во урогениталното подрачје се крие во специфичноста на женската анатомија – влезот во вагината се наоѓа во близина на отворот на дебелото црево, од една, и устието на мокрачните цевки, од друга страна, што ја зголемува можноста за пренос на непожелни бактерии во неа. Во цревата природно се наоѓаат многу бактерии кои сами по себе не предизвикуваат болест, но кога се присутни во другите органи можат да предизвикаат акутно или хронично воспаление: во вагината – вагинитис, а во мочната цевка – уретритис и циститис.
Освен близината на завршниот дел од дебелото црево и мочните цевки, причина за нарушување на рамнотежата на бактериската флора или за последична инфекција можат да бидат и навиките кои се однесуваат на половите органи, односно сексуалниот партнер. Многу полово преносливи болести, како трихомонас, кламидија, микоплазма и ХПВ кај мажите не мора да имаат симптоми, но проблем е што им ги пренесуваат на жените.
Превенција
Една од мерките на превенција, секако, е редовното одење на гинеколог, минимум еднаш годишно би требало да биде правилото. А треба да се посвети внимание и на летните температури кои можат да донесат низа непријатности.
Не заборавајте – Мокриот костим за капење, тесната облека одат во прилог на нарушувањето на интимното здравје. Во патната аптека не заборавајте да ставите и некои од проверените препарати против габична инфекција и некој пробиотик за нормализирање на вагиналната флора.
