Многу од нас сакаат светки, особено во сета оваа новогодишна еуфорија или на роденденските забави, но цената која ја плаќаме е нашето здравје и безбедноста на нашата планета. Светките, кои се всушност микропластика, се наоѓаат во бројни козметички производи во облик на микрочестички. Припадничките на понежниот пол ги користат со задоволство за да ја нагласат убавината и да заблескаат, заборавајќи притоа дека надворешниот сјај не може да го надомести оној внатрешниот.
Иако изработката на светките е едноставна (на ситни плочки кополимери се нанесува боја, а потоа на тоа се прави рефлексија, се става алуминиумска фолија), штетните ефекти од нивното таложење во домот и околината се комплицирани и повеќекратни.
Имено, светките, како и тешко разградливиот пластичен отпад, кој ја задушува нашата планета, ги загадуваат водата и океаните создавајќи во нив „пластичен смог“ кој го уништува и морскиот и копнениот свет.
Опасности за вашето здравје
Ако дома, вие или вашите деца, употребувате светки тогаш од прва рака знаете дека многу e тешко да се исчисти домот од нив. Со денови после употребата на таквите производи пронаоѓате сјајни честички по телото, во косата, на облеката, купатилото…
Заради статичкиот електрицитет светките лесно се лепат по површините, заради тоа е потребно подолго време да се отстранат од домот. Но светките не се таложат само во вашиот дом, туку и во внатрешните органи.
Светки се собираат во вашиот желудник
Откако ќе ги исперете светкавите микрочестички од лицето или телото, тие низ одводот завршуваат во отпадните води, а на крајот и во водените текови и океаните. (Хемикалии од пластика се најдени дури во 83 отсто од примероците вода низ светот!) Па тогаш кога ќе испиете чаша вода тој микроотпад доаѓа во вашиот желудник, каде со времето се акумулира затоа што не може да се апсорбира во организмот. Исто така, зоопланктонот и рибите голтаат од светките кои доспеваат во океаните затоа што се привлечени од нивниот сјај. А тоа значи дека на крајот тие повторно ќе завршат на вашата чинија (ако јадете риба). Најголеми нивоа пластичен микроотпад се најдени во морската сол. Заради тоа и со консумацијата на сол, всушност, во организмот внесувате токсични работи.
Светкавите честички доспеваат во вашите бели дробови и крвотокот
Доколку употребувате спрејови за коса или тело со светкави елементи, мора да знаете дека за време на користењето на таквите производи вдишувате дел од тие опасни микрочестички. Со нивното вдишување и преку оштетувањата на кожата овие честички се апсорбираат и во вашиот крвоток.
Светките можат да ја оштетат рожницата на окото и да предизвикаат губење на видот
Парчиња светки лесно можат да дојдат и во очите и да ја оштетат рожницата, што го зголемува ризикот од инфекции и трајно оштетување на видот. На тоа предупредуваат светските офталмолози, особено пред големите новогодишни прослави кога сме особено изложени на нив.
Воведени забрани:
Заради сите штетни последици врз човековото здравје и планетата, бројни еколози повикуваат на итна забрана за употребата на светки. Велика Британија планира во 2018 година потполно да ги забрани козметичките производи, како пилингот и геловите за лице кои во себе содржат микрогранули (слични на светките), а во некои британски градинки веќе е забранета употребата на светки. Но зошто воопшто да чекате забрана?! И самите преземете ги потребните чекори, па одбегнувајте разно-разни светки, како и сите производи кои ги содржат.
Дополнителни совети:
- Не користете шминка, лак за нокти и спрејови кои во себе содржат какви било светкави микрочестички.
- Употребувајте само органска и природна козметика. Барајте производи кои место сјај евентуално содржат минерални состојки.
- Не купувајте никакви предмети кои содржат светки – било да е во прашање домашен декор, роденденски честитки или реквизити за забави.
Зошто воопшто нè привлекуваат сјајни предмети?
Луѓето навистина отсекогаш ги привлекувале блескави предмети. Антрополозите таа опиеност од сјајот всушност ја поврзуваат со нашиот нагон за преживување. Имено, човекот уште во дамнешни времиња бил во потрага по вода, реки и потоци, чија површина блеска и светлика. Тоа е сјај кој асоцира на самиот живот. Водени од примерот на нашите предци, зошто да не, наместо од глитер на лицето и телото, да се воодушевуваме со сјајот со кој не дарува природата, на пример, со капките дожд кои светликаат на лисјата искапени со сончеви зраци или сјајот на морските бранови…
