Досега се сметаше дека липопротеините со висока густина (ХДЛ), познат како „добар“ холестерол, е добар за здравјето на срцето, во споредба со липопротеините со ниска густина (ЛДЛ), познат како „лош“ холестерол, но резултатите на новото истражување покажале дека многу високото ниво на ХДЛ, всушност, може да биде штетно за здравјето на срцето. Имено, се покажало дека високото ниво на добриот холестерол е поврзано со поголем ризик од срцев удар и смрт кај пациенти кои веќе имале проблеми со срцето.
Овие резултати се базираат на приближно четири години мониторирање на нивото на холестерол и болестите на срцето кај речиси 6 000 испитаници
Пациентите кај кои нивото на ХДЛ било пониско од 41 mg/dL или повисоко од 60 mg/dL, биле изложени на поголемен ризик од срцев удар и прерана смрт. И тоа посебно пациентите со ниво на ХДЛ повисоко од 60 mg/dl, кај нив ризикот од срцев удар или смрт од срцеви болести бил дури 50 отсто повисок отколку кај пациенти кај кои нивото на ХДЛ се движело меѓу 41 и 60 mg/dL.
Ризикот од срцев удар и смрт од срцеви болести бил поизразен кај жени со покачен „добар“ холестерол ХДЛ.
Инаку, од порано е познато дека повисоките нивоа на ХДЛ во некои случаи може да придонесат за стеснување на артериите.
Пациентите со многу висок ХДЛ холестерол би требало да се обидат да делуваат врз другите модифицирачки фактори на ризик за срцеви заболувања, како што се високиот крвен притисок, пушењето и дебелината, за да го намалат ризикот од кардиоваскуларни болести, било истакнато на годишниот состанок на Европските здруженија за кардиологија, што се одржа неодамна во Минхен, Германија.
Холестеролот се разнесува во крвта носен од протеините (белковините) во плазмата, градејќи комплекс наречен липопротеини. За разлика од ЛДЛ, кој го носи холестеролот во крвните садови и создава во нив атероматозни наслаги (плаки) кои предизвикуваат срцеви заболувања, ХДЛ ја создава еластичноста на крвните садови, а неговиот недостаток во организмот ги прави крвните садови крути и нееластични.
