Истражувачи од Кралскиот колеџ во Лондон направиле мета-анализа во која биле земени предвид повеќе од 40 различни студии, кои покажале дека во просек 23 отсто од децата, тинејџерите и младите луѓе до 25 години страдаат од зависност од паметни телефони. Во овие студии било вклучено 41 871 лице и во секоја од нив било откриено дека од ова нарушување страдаат од 10 до 30 проценти од испитаниците. Детектирана е конзистентна поврзаност помеѓу ПСУ (Проблематична употреба на паметни телефони) и проблемите со менталното здравје. Концептот на зависност од паметни телефони е контроверзен во академските кругови, па оттука му е дадена и кованицата ПСУ. Меѓутоа, извештаите кои произлегуваат од анализата покажуваат дека има доволно докази за оваа состојба да се поврзе со клиничките психијатриски проблеми.
Заклучокот е дека постои итна потреба да се развијат алатки што ќе ја намалат ПСУ, како и да се осмислат соодветни мерки што ќе ја спречат зачестеноста на ова нарушување.
Производителите на паметни телефони веќе почнаа да ги прифаќаат препораките, па така, на пример, „Епл“ го лансираше „скрин тајм“ во иОС 13, што им овозможува на родителите да контролираат колку време нивните деца поминуваат со телефонот во рака. Исто така, и некои апликации, како „Јутјуб“, им овозможуваат на корисниците увид во времето кое го потрошиле гледајќи видеа на оваа платформа.
Во секој случај, јасно е дека новите технологии честопати имаат негативно влијание врз најмладите, кои немаат мерка кога станува збор за нивната употреба. Затоа, потребно е да се пронајдат системски решенија што ќе им овозможат на децата и тинејџерите да користат телефони, но не и да претеруваат.
