Летните вирози се карактеризираат со покачена температура, болки во зглобовите и во мускулите, кивавица, солзење во очите и посебно мачнина со гадење, повраќање и појава на течна столица или дијареа. Обично траат два до три дена и лекарите препорачуваат внесување доволна количина на течности поради губењето на истите, да се мирува и да се земаат соодветни лекови за симптоматска терапија. Исто така, да се внимава на исхраната, да не се јадат тешки храни и во поголеми количини, да се избегнуваат производи кои се чуваат долго време и храна која се продава на отворено, како и храна која е лесно расиплива.
Ентеровирусот влегува во телото преку дигестивниот тракт и ја инфицира слузницата на ждрелото и на дигестивниот тракт. Се размножува во лимфните јазли, од каде потоа преку крвта се шири во органите, а многу често го напаѓа и нервниот систем. Откако ќе се зарази едно дете, болеста во просек погодува уште половина од другите деца и 25 % од возрасните членови на семејството.
Најважно е да се одржува хигиена на рацете. Овошјето и зеленчукот треба задолжително да се измие пред консумирање, а избегнувајте и контакт со нечиста вода во базените т.е. повеќекратното користење на истите крпи. Ентеровирозите не се лекуваат со антибиотици, а кај доктор е потребно да се отиде доколку, покрај наведените симптоми, се појави и повраќање, односно ако вирозата трае подолго од пет дена.
