Спортските активности ги изградуваат мускулите, но и помагаат за координација на движењата, развој на моторичките вештини и рамнотежа, вели Катја Шмит, професорка на Институтот за спортска наука на берлинскиот Универзитет Хумболдт. Истовремено кај децата се развиваат и социјалните вештини, што е особено важно во тимските спортски дисциплини како што се ракометот, одбојката, фудбалот…
„Истражувањата покажаа и дека бавењето со спорт ја поттикнува способноста на детето подобро да се концентрира на која било работа”, рекла Шмит.
Кога станува збор за сосема мали деца, оние до три години, на родителите им се советува внимателно да ја бираат спортската активност, вели кинезиологот Илона Герлинг од германскиот Спортски факултет во Келн. Таа предупредува дека не се баш сите активности погодни за децата од претшколска возраст, особено кога станува збор за деца до три години.
“На таа возраст децата треба да се поттикнуваат на активности кои ги активираат природните движења на телото. Ако започнат прерано да се занимаваат со спортски активности кои бараат активирање на точно определена мускулна група мошне често може да дојде до оштетување на мускулите, но и коските. Заради тоа важно е вежбите да се помалку напорни и за време на активноста умерено да се активирани сите мускули”, вели Герлинг.
Таа уште истакнува дека за тоа најдобра е детската гимнастика – еден од темелните спортови кои позитивно влијаат на физичките и психичките способности на детето и одлично ги воведуваат децата во спортскиот живот, а со неа можат да почнат да се бават веќе од втората година од животот.
Најдобро влијание врз обликувањето на телото и физичкото здравје има пливањето, но со таа спортска активност децата можат да почнат сериозно да се занимаваат дури на возраст од 6 до 7 години, иако некои стручњаци сметаат дека децата веќе од 5-та година можат да почнат да се занимаваат со некоја спортска пливачка дисциплина.
