Сланината, бургерите, колбасите, црвеното месо и месните преработки претставуваат ризик за заболување од рак, а според категоријата на штетност влегуваат во групата со цигарите, алкохолот, арсенот и азбестот – е предупредувањето кое го упатува Светската здравствена организација (СЗО), ставајќи ги споменатите намирници на новата листа канцерогени намирници.
На пакувањата со сланина и месни преработки наскоро би можеле да се најдат и предупредувања за штетноста на таквата храна. СЗО проценува дека месото кај луѓето предизвикува разни болести, кои само во Велика Британија годишно однесуваат 150 000 животи, пишува Дејли мејл.
Меѓу најчестите болести кои ги предизвикува црвеното месо е ракот на дебело црево, кој би можел да се спречи со поздрава исхрана и начин на живот. Месото би можело да се најде на листата – штетни намирници затоа што месото генерално содржи високи концентрации на масти, а месните преработки се сметаат за виновни за еден од 30 смртни случаи. Ако на дневно ниво се намали внесот на месни преработки во организмот, на 20 г, се верува дека бројот на смртни случаи само во Велика Британија ќе се намали за 20 000 на годишно ниво.
