Сигурно сте го слушнале изразот дека устата е огледало на здравјето, и тоа е жива вистина. Научниците тврдат дека постои клучна врска меѓу болестите на непцата и срцевите заболувања. Докажано е и дека лошото орално здравје може да биде симптом за Алцхајмерова болест. Сега научниците откриле дека темните дамки/точки по забите можат да бидат знак за целијакија, односно алергија на глутен.
Станува збор за автоимуно заболување кое го имаат повеќе од 1 отсто од луѓето на планетата Земја, а се претпоставува дека околу 2,5 проценти се недијагностицирани. Болеста претставува реакција на имунолошкиот систем на глутен – протеин кој најчесто се наоѓа во пченицата, овесот, јачменот и сличните житарки. Дигестивниот систем станува чувствителен на овие намирници и се појавуваат низа проблеми.
Само еден од проблемите е црпење на калциумот од телото или негова недоволна апсорпција од храната која настанала со неправилно варење. Недостатокот на калциум на забите се манифестира како промена на колоритот на глеѓта, најчесто во вид на точкички и дамки по површината на забот.
„Оваа состојба на забите е забележана кај 40-50 отсто од популацијата заболена од целијакија, што е драстична разлика во споредба со фактот дека дамки на забите имаат само шест отсто од здравите луѓе“, вели доктор Хилари Џеричо и додава дека за дамките е одговорен недостатокот на калциум. „За некои луѓе одењето на стоматолог е всушност клучно за откривањето на целијакија“, објаснува и вели дека единствено треба да се занемарат белите дамки кои се јавуваат кај децата кога допрва се формира вистинската боја на забната глеѓ. Исто така, не би требало да загрижуваат ниту симетричните точки по забите затоа што тоа е често знак на генетички предиспозиции. Во секој случај доколку забележите дамки, пред се, појдете кај вашиот стоматолог, а потоа и кај гастроентеролог.
