Претходни студии откриле дека среќните бракови носат низа здравствени придобивки во споредба со самците, вклучувајќи подолг живот, помалку мозочни и срцеви удари, помалку депресија и поздрава исхрана.
Сега, нова студија конкретно го проучувала нивото на шеќер во крвта кај постарите луѓе, откривајќи дека бракот или заедничкиот живот помага да се задржи нивото на шеќер под контрола. Се покажало дека ова е точно без разлика дали врската е среќна или стресна.
Експертите од Универзитетот во Луксембург и Универзитетот во Отава во Канада ги проучувале податоците на 3.335 лица на возраст од 50 до 89 години кои немале дијабетес на почетокот на студијата. Нивните сознанија се објавени во стручното списание BMJ Open Diabetes Research & Care.
Студијата вклучувала податоци собрани од примероци од крв кои ги мереле нивоата на HbA1c (просечна гликоза во крвта).
Луѓето биле прашани дали имаат сорпуг, сопруга, или партнер со кој живеат и им биле поставувани прашања за нивото на стрес и поддршка во врската.
Податоците покажале дека 76 отсто од луѓето биле во брак или живееле со некого.
Научниците откриле дека квалитетот на врската значајно не влијаела на просечното ниво на гликоза во крвта, што укажува на тоа дека да се има поддршка или затегнат однос е помалку важно отколку воопшто да се има врска.
“Генерално, нашите резултати сугерираат дека брачните/партнерските односи се обратно поврзани со нивоата на HbA1c без оглед на димензиите на брачната поддршка или стресот“, заклучиле научниците.
“Исто така, овие односи се чини дека имаат заштитен ефект против нивоата на HbA1c над прагот за преддијабетес“.
Дијабетесот погаѓа околу 422 милиони луѓе ширум светот, главно оние со низок и среден приход, а најмалку 1,5 милиони годишно умираат како резултат на дијабетес, според податоците на Светската здравствена организација (СЗО).
