Главоболката, како и многу други состојби, тешко се категоризира. Додека едни доживуваат благо пулсирање, други ја опишуваат како убиствена болка која прободува. Генерално, доколку се промени „статусот“ на главоболката, треба да побарате лекарска помош. На пример, ако претходно речиси и да не сте имале главоболки, а сега постојано ги имате и нивниот интензитет постојано се менува.
„Луѓето се вообичаено загрижени дека станува збор за тумор на мозокот, но главоболките не се симптом кој лекарите автоматски го поврзуваат со малигната болест“, објаснува американскиот професор д-р Марк Мороко.
Од друга страна, постојат предупредувачки знаци дека главоболката не е нормална и дека треба да се побара лекарска помош.
Главоболка како удари на гром
Станува збор за силна главоболка која доаѓа одеднаш и имате чувство како некој да пали и гаси светло или ве удрил со чекан по глава. Д-р Мороко тврди дека таквата главоболка може да биде знак за нешто сериозно, како субарахноидално крварење. Станува збор за нагло крварење во субарахноидалниот простор, а најчеста причина се смета пукање на аневризма. Лекарот појаснува дека овде не станува збор за оштра болка која за неколку секунди или неколку минути престанува. Станува збор за болка која не престанува толку брзо и имате чувство дека главата ќе ви експлодира. Често е проследена со губење или пореметување на свеста. Во вакви состојби, тој препорачува да не се консумираат силни лекови против болка или да се отиде на спиење. Веднаш се бара лекарска помош.
Засилен интензитет
Мигрената или тензичната главоболка не се нужно нешто што треба да претставува знак за тревога.
„Замислете дека главоболката е мелодија на некоја песна и размислете дали ја менува гласноста“, вели д-р Мороко. Тој додава дека не е проблем ако се менува гласноста, туку она што би можело да биде проблем е ако се „менува песната“. Оваа главоболка е сосема поинаква од оние кои секогаш сте ги имале.
Со главоболката имате и други симптоми
Силната главоболка во комбинација со зголемена телесна температура е загрижувачка.
„Тоа може да укажува на инфекција на мозокот, како што е менингитис или може да биде знак за енцефалитис (воспаление на мозокот)“, појаснува лекарот. Ако со тоа почувствувате и промени на менталната состојба, не можете да се сетите на банални работи, губите осет за одредени делови на лицето или телото, тоа е веќе доволна причина за итна помош.
Болката е концентрирана на делот на окото
„Ако имате главоболка проследна со болки во окото, а особено ако дојде до промена на видот, тоа е причина за тревога“, вели д-р Мороко. Можеби станува збор за акутен глауком или зголемен притисок во окото.
Болката е концентрирана во слепоочниците
Во поголемиот број случаи, локацијата на главоболката не е показател за нешто застрашувачко. Но, ако лицето има над 50 години и главоболките му се фокусирани на слепоочниците, тоа може да биде знак за воспаление на артериите во слепоочниците. Ако сето тоа е проследено со матен вид или треска, веднаш обратете се на лекар.
