Истражување на научниците од британските универзитети Кембриџ и Гринвич, објавено завчера, покажува дека само карантинот нема да спречи повторно ширење на новиот коронавирус SARS-CoV-2, но дека и заштитните маски дома направени можат значајно да ја намалат стапката на пренос на болеста, ако доволен број на луѓе ги носат во јавен простор.
“Нашите анализи одат во прилог на моменталното и општо прифаќање на носењето маски“, изјави Ричард Стут, еден од авторите на студијата на Кембриџ.
Резултатите од истражувањето покажуваат дека масовното носење маски во комбинација со совијалната дистанца и некои мерки на карантин може да бидат “прифатлив начин на соочување со пандемијата“, многу пред да се развие и да биде достапна успешна вакцина против КОВИД-19, респираторна болест предизвикана од коронавирус.
Светската здравствена организација минатат недела објави насоки во кои им советува на владите да препорачуваат носење маски во јавни простори на сите граѓани, со цел да се намали ширењето на болеста.
Научниците во ова истражување го проценувале ефекетот од репродукциската стапка на болеста, односно Р вредноста, во различни сценарија на носење маски во комбинација со периоди на карантин. Р вредноста го означува просечниот број на лица на кои еден заразен пациент ќе им ја пренесе болеста, а Р вредноста над 1, може да доведе до експоненцијален раст на бројот на заразени.
Студијата покажала дека постојаното носење маска во јавност е двојно поуспешно во намалување на Р вредноста, отколку ако маските се носат тогаш кога ќе се појават симптоми.
Во сите истражени сценарија во студијата, редовното носење маски кај 50 и повеќе проценти од популацијата, го намалува ширењето на коронавирусот на Р помал од 1, што ја израмнува кривата на ширење на заразата и овозможува поблаги мерки на карантин.
“Немаме што да изгубиме со масовното прифаќање на носењето маски, а добивката би можела да биде многу значајна“, вели Рената Реткут, коавтор на истражувањето.
