Со желба за успешна размена на искуства и споделување на новини во медицината вчера во Охрид, претседателот на Македонското здржение за алергологија и клиничка пулмологија проф. д-р Дејан Докиќ и официјално го отвори четвртиот конгрес на Здружението со меѓународно учество. Целта на конгресот, кој ќе трае до недела, според проф. Докиќ е плодна размена на мислења, искуства и визии помеѓу македонските, европските и интернационалните колеги кои се дел од овој настан.
Успеавме на едно место, овие три дена освен пулмолозите и алерголозите, да ги собереме и педијатрите, дерматолозите, интернистите, специјалистите по медицина на труд, офталмолозите, оториноларинголозите. Ќе биде ова повеќе и од успешен конгрес на кој освен стручноста, не сплотува и пријателството со многу колеги, изјави вчера на отворањето претседателот на МЗАКИ проф. Докиќ.
На конгресот ќе бидат опфатени теми како астмата, ринитисот, имунотерапијата, педијатриските алергиски болести, уртикаријата, атопискиот дерматитис, нутритивните алергии, алергиите на лекови, анафилаксата, професионалните алергиски болести, очните алергиски болести, имунолошките болести…
Овој конгрес, нагласи проф. Докиќ, е специфичен по својот карактер со оглед дека ги интегрира сите супспецијалности кои се занимаваат со оваа проблематика и е посветен на новините од областа на алергологијата и имунологијата.
