Засега, вакцините се се уште ефикасни и можат да не заштитат од потешки форми на болеста КОВИД-19 и од смртен исход како последица на зараза со делта варијантата, но научниците се претпазливи. Еве што досега се знае:
ДЕЛТА Е СЕ УШТЕ ДОМИНАНТНА
Делта варијантата, која прв пат е открена во Индија во декември 2020 година и понатаму е верзија на вирусот SARS-CoV-2 која најмногу ги загрижува научниците.
Светската здравствена организација ја класифицира како варијанта која “предизвикува загриженост“, што значи дека е во состојба да го зголеми пренесувањето на вирусот, да предизвика потешка форма на болеста или да ја намали придобивката од вакцината и лекувањето.
“’Супермоќта“ на делта сојот е неговата преносливост, вели Шејн Кроти, виролог од Институтот за имунологија во Сан Диего.
Делта е повеќе од два пати позаразна од претходните варијанти SARS-CoV-2, велат податоците на Центарот за контрола и превенција ан болести на САД (ЦДЦ). Студиите укажуваат на тоа дека е поверојатно дека лицата заразени со делта ќе завршат во болница во однос на заразени со претходните форми на вирусот.
Делта варијантата може да предизвика симптоми два до три дена порано од изворниот коронавирус, што на имуниот систем му дава помалку време да се подготви за одбрана.
Заразените со делта варијантата во носната шуплина носат околу 1200 пати повеќе вируси во споредба со оригиналната варијанта на коронавирусот.
Количината на вирус кај вакцинираните лица кои се инфицираат со делта е еднаква на онаа што ја имаат невакцинираните, а двете групи можат да го пренесат вирусот на други.
Но, за разлика од невакцинираните, кај вакцинираните лица количината на вирусот побрзо опаѓа. Научниците велат дека тие го шират вирусот многу пократко.
Според СЗО, делта варијантата чини 99,5 проценти од сите геномски секвенци пријавени во јавните бази на податоци и ги надминала сите останати варијанти во повеќето земји.
ДАЛИ И ПОНАТАМУ ЌЕ МУТИРА?
Експертите за вируси внимателно го следат развојот на делта варијантата, барајќи каков било знак што би укажал дека успеала да мутира така да ја пробие имунолошката заштита обезбедена од вакцината или природно прележаната инфекција.
Дури и да е така, иако постоечките вакцини спречуваат развој на потешки форми на болеста и смртен исход од КОВИД-19, тие не ја спречуваат инфекцијата. Вирусот и понатаму е во состојба да се размножува во носната шуплина – и меѓу вакцинираните, кои потоа можат да ја пренесат болеста преку ситни аеросоли.
За целосна победа над SARS-CoV-2 најверојатно ќе биде потребна нова генерација вакцини кои ќе го спречат пренесувањето на вирусот, вели д-р Грегори Поланд, еден од научниците кои работат во Мајо клиниката на развој на нови вакцини.
“За жал, дотогаш светот и понатаму е ранлив“, заклучува д-р Поланд.
