Од завчера, закажувањето за земање брис, односно за тестирање за коронавирус, се прави и преку матичниот лекар. Ако имате некој од симптомите: сува кашлица, висока температура, треска или отежнато дишење, прво што треба да направите е телефонски да го исконтактирате својот матичен лекар. Не се препорачува посета на матичниот лекар во неговата амбуланта.
Телефонски, вашиот матичен лекар ќе ви постави 10 прашања. Според дадените одговори на т.н. епидемиолошка анкета преку електронски алгоритам лекарот утврдува дали ви е потребно тестирање и колкав е степенот на итност.
При тоа, надлежните служби апелираат лицата да даваат точни податоци и да го контактираат матичниот лекар исклучиво ако имаат симптоми.
Во случај да треба да се изврши тестирање, матичниот лекар го закажува тестирањето преку “Мој Термин” на некој од пунктовите според местото на живеење на пациентот. Без закажување, не е возможно да се изврши тестирање, па и да отидете до некој од пунктовите, без закажан термин нема да бидете тестирани.
Во закажниот термин, лицето не треба да оди кај матичниот лекар или да се зема некоја потврда, туку директно треба да отиде на пунктот и да биде тестирано. При доаѓањето на местото за земање брис, се советува да носите заштитна опрема и да не користите јавен превоз.
По земањето брис и соодветно испитување, секој пациент ќе биде лично известен и согласно здравствената состојба ќе биде упатен на понатамошно лекување – во клиника, болница или во домашни услови. Доколку е упатен на домашно лекување, пациентот ќе биде во секојдневна комуникација со матичниот лекар, како и со сестра и лекар од Клиниката за инфективни болести и фебрилни состојби.
