Постојат разни ризик фактори кои доведуваат до недостаток на витамини, како неправилна исхрана, строги диети, недоволна физичка активност, неумереност во алкохолот, одредени лекови и болести.
Еве како можете да препознаете дека вашето тело има недостаток на витамини;
СУВИ ОЧИ
Витаминот А со причина се нарекува и очен витамин. Тој е составен дел од солзната течност, односно слузницата, па ако очите постојано ви се суви, можно е да ви недостасува токму овој витамин. Освен за слузницата на окото, витаминот А е нужен и за здравјето на сите слузници во организмот (усна шуплина, бели дробови, желудник, црева).
НОЌНО СЛЕПИЛО
Според Светската здравствена организација, недостатокот на витамин А е главна причина за појава на слепило кај младите, кое може да се спречи. Се смета дека милиони деца годишно го губат видот поради недостаток на овој витамин. Но, освен младите, загрозена група се и трудниците, предупредуваат стручњаците, кои треба посебно да внимаваат на внесот на витамини.
АНЕМИЈА
Анемијата значи намален број на црвени крвни клетки (еритроцити) или хемоглобин во крвта. Често се смета дека причина за анемијата е намалениот внес на железо со храната, но причините за анемија може да бидат различни. Покрај железо, за спречување на разни видови анемија придонесува и витаминот Ц и витамините од Б групата. Симптомите на анемија вклучуваат слабост, општ замор, бледа или жолтеникава кожа, бледи нокти и внатрешност на очните капаци. Во тешки форми на анемија присутни се вртоглавица, отежнато дишење, главоболка, тинитус (зуење во ушите).
ВРТОГЛАВИЦА
Според нутриционистот Лиза Ричардс, недостатокот на витамин Б12 може да доведе до депресија, конфузија, проблеми со меморијата и деменција, како и вртоглавица.
АРИТМИЈА
Според порталот WebMD, аритмиите значат прескокнување на срцето, а причина може да биде недостаток на витаминот Б12.
БРЧКИ
„Недостатокот на витамин Ц ќе го забрза процесот на стареење“, објаснува нутриционистката Ен Рамарк и тоа е затоа што го регулира производството на колаген, протеин одговорен за еластичноста на кожата. Зголемете го внесот на овошје и зеленчук ако сакате да видите промена на лицето.
ОТЕЧЕНИ НЕПЦА
Можно е недостатокот на витамин Ц да ги крие своите симптоми во вашата уста. Според стоматологот Даниел Балазе, ако вашите непца се чувствителни, црвени или отечени, може да имате недостаток на витамин Ц.
ПРОБЛЕМИ СО СПИЕЊЕТО
Недостатокот на витамин Д е поврзан со многу промени во спиењето, од кои едната е слаб сон. Исто така е поврзано со зголемени воспалителни процеси во носот и синусите, што може да доведе до апнеа при спиење. Анализата на податоците од 2018 година покажува дека луѓето со недостаток на витамин Д имаат 50 проценти поголема веројатност да страдаат од нарушувања на спиењето.
