Израелското министерство за здравство инфрмираше дека помал број на случаи на воспаление на срцевиот мускул, главно воочен помеѓу млади мажи вакцинирани со Фајзер вакцината против КОВИД-19, веројатно е поврзан со вакцината.
Фајзер тврди дека не е забележана поголема стапка на појава на миокардитис и неговата вакцина отколку што во вообичаени околности би можело да се очекува кај општата популација.
Помеѓу декември 2020 и мај 2021 во Израел се евидентирани 275 случаи на миокардитис од над пет милиони вакцинирани лица, соопшти министерството, објавувајќи ги резултатите од студија која е нарачана за да се разјасни оваа појава.
Повеќето пациенти кај кои се развило воспаление на срцевиот мускул, биле згрижени во болница најмногу четири дена, а 95 проценти од случаевите се сметаат за блага форма на болеста, покажала студијата спроведена од три тима на стручњаци.
Истражувањето покажало дека “постои веројатна поврзаност помеѓу вакцинацијата со втора доза на Фајзер вакцината и развојот на миокардитис меѓу мажи на возраст од 16 до 30 години“, стои во соопштението од министерството и се додава дека повеќе такви случаи се воочени помеѓу млади мажи на возраст од 16 до 19 години, отколку кај останати возрасни групи.
Од Фајзер велат дека ги следат резултатите од израелската студија, но тврдат дека не е утврдена причинска поврзаност со нивната вакцина, ниту пак е забележано дека таа болест ја има повеќе од вообичаено.
Несаканите последици темелно се проучуваат, а стручниот тим на Фајзер редовно се состанува со членовите на Одборот за безбедност на вакцини при израелското Министерство за здравство за да се прегледаат и проучат податоците, стои во соопштението.
По вакцинирањето на возрасните, израелските научни власти не издадоа одобрение за вакцинирање на млади на возраст од 12 до 15 години додека се чекаше извештајот од Министерството за здравство.
„Но, комитетот сега даде зелено светло за вакцинирање деца на возраст од 12 до 15 години од следната недела“, изјави Нахман Еш, израелски координатор за пандемијата, истакнувајќи дека „ефективноста на вакцината ги надминува ризиците“.
