Дијагностицирањето и лекувањето на воспалено грло треба да биде дел од превенцијата на ревматските болести на срцето, како што е и воспалението на срцевиот мускул, односно миокардитис. Имено, на миокардитис и на другите болести од оваа група обично им претходи респираторна или гастроинтестинална инфекција.
Вируси, бактерии, паразити, некои лекови и автоимуни реакции во потежок случај може да предизвикаат воспаление на срцевиот мускул – миокардитис.
Силниот имун систем ќе ги елиминира микроорганизмите од телото по една до две недели, но во некои случаи, во клетките на срцевиот мускул останува вирусен ген кој предизвикува воспалителна реакција со клиничко влошување. Ако е воспален и перикардот, се работи за перимиокардитис.
Д-р Лесл Зулке, од Универзитетот Кејптаун и д-р Генсан Картикејн во својата новата студија истакнуваат дека еден од четири случаи на воспаление на грло е предизвикан од стрептококи од групата А, а ако инфекцијата не се лекува, може да дојде до развој на ревматски болести на срцето.
“Примарната превенција е клучниот елемнт во превенција на ревматските болести на срцето, оти лек за болеста всушност не постои. Подоцна на располагање ни се само скапи хируршки зафати“, велат двајцата автори на студијата.
Многу пациенти воопшто не го поврзуваат воспалението на грло со можни компликации со срцето во иднина и така ја запуштаат причината за појава на сериозни болести.
