Вртоглавицата (lat. Vertigo) не е болест, туку симптом кој укажува на одредени пореметувања или здравствени проблеми кои треба да се утврдат и навреме да се пристапи кон лекување. Затоа не го игнорирајте овој симптом, и не само затоа што е исклучително непријатен, туку за да се открие вистинската причина за појавата на вртоглавицата која во голем број случаи може да се лекува.
Постојат повеќе од 350 состојби кои можат да ја предизвикаат, а после болката во градите и уморот таа е една од најчестите состојби заради која пациентите бараат лекарска помош.
Вртоглавицата во реалноста е само симптом кој упатува на пореметување на функционирањето на системот за рамнотежа. Може да биде проследена со занесување, главоболка, чувство на несвестица, страв или паѓање, како и со појава на несакани „играња“ на очите, како и отежнато движење. Оние кои доживеале силни вртоглавици се жалат на отежнато движење, влошување на симптомите на светлина, како и мачнина и повраќање. Лекарот ќе утврди дали се работи за вртоглавица за која причина е пореметувањето во внатрешното уво или се работи за пореметување на средишниот нервен состав или, пак, станува збор за некој психолошки проблем кој довел до чувство на нестабилност.
Неретко чувството на вртоглавица е предизвикано и од нагло станување или положбата на спиење. Тогаш станува збор за таканареченото бенигно позиционо вертиго. Освен метаболни причини, вртоглавицата од централно потекло можат да ја предизвикаат и мигрени, мултипла склероза, тумори на задната черепна јама, мозочен удар, инфекции на мозокот, мозочна траума, тумор на статоакустикус, нерв кој пренесува сигнали до мозокот. Туморот најчесто покажува симптоми дури откако ќе нарасне до големи димензии, што лошо влијае на прогнозата на болеста. Заради атеросклеротично стеснетите крвни жили во вратот, во услови на послаб проток на крв, често се случува мозокот привремено да остане без кислород, што може да резултира со вртоглавица со често присутен страв и чувство на несвестица. Слична појава понекогаш се случува и кај здравите луѓе после нагло станување. За да не стравувате од повторувањето на овој непријатен симптом навреме утврдете ја причината и почнете со лекување.
